Tuia ki te rangi
Tuia ki te whenua
Tuia ki te moana
Tuia te here tāngata
E rongo te pō, e rongo te ao
Tuia i te muka tangata
i takea mai i Hawaiki Nui
i Hawaiki Roa
i Hawaiki Pāmamao
Te hono ā-wairua
Ka puta mai ki te whai ao
Ki te ao mārama
Tihei mauri ora
E ngā iwi o te motu, rarau mai rā ki Te Kooti Whenua Māori e tawharau nei i te pae tangata, i te pae whenua, i te whare kōrero
Tēnei māua ka mihi ki ō koutou kāwai whakapapa tapu e hora atu nei
Tēnei māua ka mihi ki ngā tini mate kei waenganui i a koutou, ngā tini mate kei waenganui i a tātou katoa
Ko te hunga mate - rātou ki a rātou
Ko te kanohi ora - tātou ki a tātou
Tēnā rā koutou katoa
Nau mai e te tī, e te tā
Haere mai koutou
Kuhu mai kia mōhio, kia mārama
Tū mai rā, e ngā rangatira o te whenua hei rangatira
Tū atu rā, i raro i te mana o te whenua
Hei oranga mō tātou te tangata, hei oranga mō ngā uri whakatupu e heke mai nei
Nō reira e ngā iwi, nau mau, haere mai, kuhu mai ki Te Kooti Whenua Māori.
