Whakarongo ake māua
Ki te tangi a te manu nei
a te tui
He kōrero nā tō mātou Kaiwhakawā Matua rāua ko te Pae Matua.
Whakarongo ake māua
Ki te tangi a te manu nei
a te tui
Tūī, tūī, tūī tuia
Tuia i runga
Tuia i raro
Tuia i waho
Tuia i roto
Tuia i te here tangata
Ka rongo te pō
Ka rongo te ao
Tuia i te muka tangata
I takea mai i Hawaiki nui
I Hawaiki roa
I Hawaiki pāmamao
Te hono a wairua
Ka puta mai ki te whai ao
Ki te ao mārama
Tihei mauri ora
Ki ngā mate huhua o te wā kei tēnā marae kei tēnā marae
Ka tangi tonu mātou
Haere atu ra koutou ki te pō
Ki te rārangi mātua o ngā tūpuna
Ki reira moe ai
Āpiti hono tātai hono rātou te hunga mate ki a rātou
Āpiti hono tātai hono tātou te hunga ora kia tātou
Otirā tēnā koutou katoa
Whakatau mai rā e ngā tō pito whānui o te motu ki te pae o Te Kooti Whenua Māori
Nau mai e ngā hua i puta mai ai i te ao kikokiko
Haere mai koutou
Kuhu mai e te iti e te rahi kia mōhio kia mārama
Tū mai rā e ngā rangatira o te whenua hei rangatira
Nō reira, tū atu i raro i te mana o te whenua
Hei oranga mo ngāi tātou te tangata
Piki mai rā koutou ki te tomokanga whare o Pātaka Whenua
He pātaka mōhiohio
He pātaka tiaki kōrero
He pātaka honohono e te tangata ki te kooti
Haere mai, nau mai, kuhu mai ki Pātaka Whenua
Nau mai ki te paetukutuku mō Te Kooti Whenua Māori kua whakahoutia te āhua. Kua āta whakaritea ngā mōhiohio, ngā rauemi me ngā hono whaitake kia māmā ake ai mōu ki te tīmata, te haere tonu rānei i tō hīkoi me tō whenua, whānau hoki.
Ko te paetukutuku te kuhunga ki tā mātou tomokanga tuihono hou te Pātaka Whenua.
I te Pātaka Whenua, ka kitea e koe ngā mōhiohio mō tō whenua, ka taea te rapu te pūkete kooti, te tuku tono tuihono, uiui tuihono rānei me te utu i te utu tāpae tono. Ā, ka taea e koe tērā ahakoa te wā o te rā, te pō rānei mai i te wāhi i te ao kei reira koe.