I whakapuakina e Hōnore Willie Jackson kua tohua ko Alana Thomas hei Kaiwhakawā Kooti Whenua Māori i te 22 o Maehe 2023.
Kei ngā maunga whakahī, kei ngā wai tuku kiri, kei ngā mātāwaka o te motu, nei rā te mihi ki a koutou.
Ka tika me mihi ki te hunga kua riro atu ki te pō, ki ngā mate o tēnā iwi o tēnā iwi, e kore te aroha o rātou mā e waikuratia. Hoki ora mai ki tātou ngā waihotanga o rātou mā, tēnā koutou tēnā tātou. Me huri aku whakaaro i ēnei wā ki ngā pito o te motu kua pāngia e te huripari, auē te mamae me te ngaukino nei.
Kāti ake ka huri ki te kaupapa, e hika ma, nōku te hōnore ki te tuku i tēnei pānuitanga motuhake.
E te uri o Ngāti Rēhia, te uri o Ngāti Kurī tēnei uri o Ngā Puhi nui tonu piki mai rā ki te pae whakawā, whakaeke mai ki te Te Kooti Whenua Māori ki Te Roopu Whakamana i Te Tiriti, whakatau mai rā ki tō tūranga hōu! E Alana Miriana Thomas, nau mai me ōu pūkenga maha hei hua mo ngāi Māori.
Ka nui te hari ki te pānui kua whakapuakina e te Minita o Te Puni Kōkiri kua tohua ko Alana Mariana Thomas hei kaiwhakawā pūmau o Te Kooti Whenua Māori. Ko Kaiwhakawā Thomas te Tumuaki i Kaupare Law and Consultancy, ā, he tohu LLB, BA mai i Waipapa Taumata Rau. E tino kaingākau ana a Kaiwhakawā Thomas ki te pupuri, te whakapakari me te whakatairanga i ngā āhuatanga katoa o te ao Māori.
Ka whakaūngia te rā o te hui whakamana ā tōna wā, ā, i tōna whakamanatanga ka mahi ia i Te Whanganui-a-Tara.
I puta i a Hōnore Willie Jackson, Minita o Te Puni Kōkiri tētahi whakapuakitanga ōkawa i te 22 o Maehe 2023: Kopounga hou ki te pae whakawā o Te Kooti Whenua Māori | Beehive.govt.nz
Ka tuku mihi ahau, me ngā whakamihi a Te Kooti Whenua Māori, ki a Kaiwhakawā Thomas. E rikarika ana ahau ki te whakatau i a Kaiwhakawā Thomas i a ia ka whai i tōna ara hou ki te pae whakawā o Te Kooti Whenua Māori.
Kua piki te manu ki te rangi, heoi anō tā tātau, te titiro pewhea tōna rere.
Nō te pāpā Rangitihi Tahuparae tēnei kōrero.
Nāku iti nei
Kaiwhakawā Matua W W Isaac