Chief Judge Fox announces the appointment of a Deputy Chief Judge and a new Judge to our Court, as confirmed by Minister for Māori Development Tama Potaka.
Tirama ana ngā whetu o te ata, ko Puanga kei runga, ko Takurua kei runga. Koia ko Matariki e tiaho iho nei. Horahia e Matariki ki te whenua, te māramatanga mo te motu e tohu ana i te tau hou. Auē te tini me te mano kua mōnehunehu i te kanohi tangata. Ngā mate o te tonga, o te raki, o te rāwhiti, o te uru, haohia i Te Kupenga o Taramainuku ki Te Waka o Rangi. Tēnei mātou ngā waihotanga e mihi poroporoaki ana e tangi apakura nei.
E aku rau rangatira mā, koutou tātou te kaupapa tangata te kaupapa kōrero, tēnā tātou e Te Kooti Whenua Māori e Te Rōpū Whakamana i te Tiriti. Kia hiwa ra, kia hiwa rā! Nōku te maringa nui kia tauākī nei te kopounga o te Kaiwhakawā Matua Tuarua me te Kaiwhakawā hōu ki tō tātou Kooti.
E karanga atu ki tēnei uri o Ngāti Mākino, Ngāti Pikiao, Ngāti Awa me Ngāti Maru, CRAIG COXHEAD, touti mai ki tō tūranga o te Kaiwhakawā Matua Tuarua. Haere mai rā me tō raukotahi hei hoe urungi mo te Kooti.
E karanga atu ki tēnei uri o Ngāti Porou o Ngāi Tahu hoki, NATHAN MILNER, whakaeke mai rā ki tō tira hōu, te tira Kaiwhakawā.
E harikoa ana ahau ki te pānui kua whakaūngia e Hōnore Tama Pōtaka, Minita Whanaketanga Māori, te kopounga o tētahi Kaiwhakawā Matua Tuarua me te kopounga o tētahi Kaiwhakawā hou ki tō mātou Kooti. Pānuitia te pānui arapāho a te Minita ki konei Judge Craig Coxhead and Nathan Milner newest Māori Land Court appointments | Beehive.govt.nz.
KAIWHAKAWĀ MATUA TUARUA – CRAIG COXHEAD
E manahau ana ahau ki te pānui kua kopoua a Kaiwhakawā Craig Coxhead hei Kaiwhakawā Matua Tuarua o tō mātou Kooti. I kopoua a Kaiwhakawā Coxhead ki te Kooti Whenua Māori i te tau 2008, ā, koia tētahi o ngā kaiwhakawā o te rohe o te Waiariki, koia hoki tētahi o ngā Āpiha Whakahaere o Te Rōpū Whakamana i Te Tiriti o Waitangi, te Kaiwhakawā Matua o te Kōti Mana Nui o Niue, he Kaiwhakawā o te Kōti Matua o Kuki Airani. 16 tau te roa e mahi ana hei kaiwhakawā, ā, he whānui ana wheako, tana mōhio hoki ki te ture, ki te tikanga hoki, hei tūāpapa ēnei mō tana tūranga hou hei Kaiwhakawā Matua Tuarua. Hei tāpiri ake ki ana mahi o nāianei, ka rongo ia i ngā tono mō te tūranga Kaiwhakawā Matua, ā, māna ahau e tautoko ki te ārahi i te Kooti.
Ka noho tonu a Kaiwhakawā Coxhead hei kaiwhakawā i te rohe o te Waiariki, ka noho hoki ki te Tari Kaiwhakawā i Te Whanganui-a-Tara ina hiahiatia ana. Ka whakamihia te kopounga o Kaiwhakawā Coxhead hei Kaiwhakawā Matua Tuarua, ā, ka whakaūngia ngā taipitopito ā tōna wā.
KAIWHAKAWĀ HOU – NATHAN MILNER
E manahau ana hoki ahau ki te pānui kua kopoua a Nathan Milner, nō Ngāti Porou me Ngāi Tahu, hei Kaiwhakawā hou o te Kooti Whenua Māori. He rōia a Kaiwhakawā Milner i tēnei wā, he Rōia Tūhono Matua ia, ā, he Rōia Kōti Motuhake i Kāhui Legal. I whiwhi ia ki tana tohu LLB me te BA mō te Te Ao Māori me te Mātai Tōrangapū, me te Hononga Tāwāhi, ā, me te Tāhu Paetahi (Taumata Tuatahi) mō te Mātai Tōrangapū me te Hononga Tāwāhi i Te Herenga Waka. E mōhio pai ana a Kaiwhakawā Milner ki ngā mahi a Te Kooti Whenua Māori me Te Rōpū Whakamana i Te Tiriti o Waitangi nā ana mahi whānui hei rōia mā ngā kaipupuri whenua me ngā rōpū kerēme i ngā kōti e rua, me ana mahi i roto i ngā whiriwhiringa whakatau take Tiriti, me ana wheako i roto i ngā kēhi whakahaere rawa, huarawa hirikapo, Takutai Moana hoki. Kua hoki mai anō a Kaiwhakawā Milner ki te Kōti me te Taraipiunara, i te tīmatanga o tana aramahi he Rōia Rangahau ia mō Te Kooti Whenua Māori, he Rēhita Āwhina hoki ia mō Te Rōpū Whakamana i Te Tiriti o Waitangi.
Ka whakaūngia te hui whakaoati i a Kaiwhakawā Milner ā tōna wā, ā, kia whakaoatihia ka noho ko ia tētahi o ngā kaiwhakawā mō te rohe o Te Tairāwhiti.
Tēnā kia whakanui tātou i ēnei kaiwhakawā kua kopoua ki ēnei tūranga. E rikarika ana ahau ki te whakanui i a Kaiwhakawā Coxhead hei Kaiwhakawā Matua Tuarua, me te pōwhiri ōkawa i a Kaiwhakawā Milner, e whai nei i tōna ara hou ki te pae whakawā o Te Kooti Whenua Māori.
Hei whakakapi i tēnei tauākitanga, ka mutu awau me ngā kupu o te waiata o Te Kooti Whenua Māori: Whakatutukihia ngā herenga, whītikitikiria ki te ture, kei konei ngā tūmanako, kei konei ngā wawata, ka tau te mauri o te Tipuna Whare, ka tau te Aio o te iwi e.
Dr C L Fox
KAIWHAKAWĀ MATUA