Ko te noho, te whakatū whare rānei ki runga whenua Māori tētahi o ngā tino whakamahinga, ā, he tūhono i te whānau ki ō rātou whenua. He hātepe roa pea tēnei, engari he nui ngā painga. E toru ngā āhuatanga matua me whakaaroaro e koe mēnā kei te hiahia koutou ko tō whānau ki te noho, te whakatū whare rānei i runga i ō whenua.
Ki tēnei whārangi
Te whakawhiti i ō hea
I mua i te whakarite ki te hanga whare, me mātua whakarite he rangatira whenua/kaipānga nō tētahi tarahiti whānau o te whenua. Me rapu e koe e hia te nui o ō pānga (e mōhiotia anō ko ngā hea) ā-whenua i roto i te poraka.
Ka taea e koe te tatou tēnei mā te wehe i ō pānga (hea) mā te tapeke o ngā pānga (hea) i roto i te poraka whenua ka whakarea ake mā te nui o te wāhi. Hei tauira:
| Horahanga tapeke ā-heketea o te poraka | whakawehea | Pānga (hea) tapeke o te poraka | whakareatia | Ngā pānga (hea) o ngā Rangatira Whenua kei te poraka | whakareatia | Te nui o ngā mita pūrua (m²) i tētahi heketea | ko te hua | Te horahanga ā-mita pūrua (m²) |
| 8.2016ha | whakawehea | 55 | whakareatia | 0.0095 | whakareatia | 10,000m² | ko te hua | 14.1664m² |
Kia mōhio: Me whakamahia pea koe i te pātene panuku kei te tūtohi i runga ake kia kite ai i te katoa o te tātai.
Ka kitea e koe te "Horahanga tapeke ā-heketea o te poraka", "Pānga (hea) tapeke o te poraka", me Ngā pānga (hea) o ngā Rangatira Whenua kei te poraka" i Pātaka Whenua. Mō te "Te nui o ngā mita pūrua (m²) i tētahi heketea", me whakamahi i a Kūkara.
Ko te nama i mua o tētahi tau ā-ira, i tēnei tauira, ko ngā hea o ngā rangatira whenua o te 0.0095 he 14.1664m². Arā, 14m² nō te rangatira whenua, nō reira kāore i te nui ana hea hei whakatū whare. Arā atu anō ētahi atu ara hei whakarahi ake i ō hea - mēnā e pērā ana koe, me whakapā mai.
Tata ki te 1500m² te whenua e hiahiatia ana mō te whakatū i tētahi whare kotahi. Engari, he rerekē tēnei mai i te 1500m² - 3000m² e ai ki te kaunihera e whakahaere ana i ō whenua.
Hei whakaū i te whakaritenga iti rawa mō tō poraka, me whakapā atu ki te kaunihera e hāngai ana ki tō poraka.
He wāhanga pea tō te kōti ki te takawaenga i ngā rangatira whenua, e whakarite ana kāore e nōhia, whakamahia rānei e te rangatira whenua nui rawa i te whenua wāriu nui rawa, ā, ka rarua ko ngā rangatira whenua he iti iho ō rātou pānga. Waihoki, ka whakarite mātou kāore e nui rawa ngā hiahia o ngā rangatira whenua he iti iho ō rātou pānga.
Te whakaae a ētahi atu kaipupuri whenua
I te nuinga o te wā, he nui atu i te tangata kotahi ngā kaipupuri whenua Māori, nō konei te kōrero ‘te whenua he maha ōna kaipupuri whenua’. Me mahi tahi koe me ētahi atu kaipupuri whenua kia tautoko mai rātou me te whakaae ki te whakamahi, te noho, te whakawhanake hoki/rānei i tō whenua. Ahakoa he roa pea te wā, te mahi, te manawaroa mō tēnei, he mea nui kia tautoko mai ētahi atu kaipupuri whenua i mua i te tuku i tētahi tono. Ka whai whakaaro te kaiwhakawā i ngā wā katoa ki te oranga o te whenua me ētahi atu kaipupuri whenua ina tuku whakatau ana.
Mēnā ka tono koe kia noho i tō whenua, me kōrerorero koe mō ngā whakaritenga ki te nuinga o ētahi atu kaipupuri whenua ka taea e koe. Mo ēnei kōrerorero, me whai koe i tētahi mahere ā-tuhi e whakaatu ana i te wāhi e hiahia ana koe ki te noho, te whakatū whare rānei, tētahi tātaitanga o te nui o te whenua ka hiahia koe, me ngā kōrero mō te painga ki ētahi atu kaipupuri whenua o tō noho, whakatū whare rānei.
Ka uaua pea te whakapā atu ki ētahi atu kaipupuri whenua, engari me tino ngana koe ki te rapu me te whakapā atu ki a rātou ki te kōrero mō ō whakaritenga.
Te whakaae a ngā taratī, te kaporeihana Māori rānei
Me kī ka whakahaerehia te whenua Māori e tētahi tarahiti, kaporeihana whenua rānei mā ngā kaipupuri whenua, kaipupurihea rānei. I tēnei āhuatanga, ka taea e koe te kōrero tika atu ki ngā taratī mō te noho, te whakatū whare rānei ki te whenua, ā, ka taea e rātou te whakaae ki ō whakaritenga me te kore whakauru o te kooti, mēnā ka whakaaetia e te tarahiti.
Pērā anō me ētahi kaipupuri whenua, me whakarato e koe tētahi mahere ā-tuhi ki te tarahiti, te kaporeihana whenua rānei e whakaatu ana i te wāhi e hiahia ana koe ki te noho, te hanga whare rānei, tētahi tatau o te nui o te whenua ka hiahia koe, me ngā kōrero mō te painga ki ētahi atu kaipupuri whenua o tō noho, hanga whare rānei.
Te tono ki te noho i tō whenua
Pūtea me ngā mōkete
Ka taea te whenua Māori te whakamahi hei whai pūtea, mōkete rānei pērā anō i tētahi atu pānga i roto te whenua.
Ka taea tētahi mōkete, pūtea tārewa rānei e te:
- kaipupuri whenua kotahi o tētahi poraka whenua Māori
- ngā rangatira whenua katoa o tētahi poraka whenua Māori e mahi tahi ana
- ngā taratī o tētahi poraka whenua Māori kua whakamanatia ki te whai pūtea ko te poraka hei punga, tērā rānei
- tētahi kaporeihana whenua Māori e pupuri ana i te whenua Māori.
Mēnā kei te whakaaroaro koe ki ngā whakaritenga pūtea, mōkete rānei, me whakaaroaro e koe:
Te wāriu o te whenua – E hia te wāriu o te whenua i roto i te mākete?
Tō kaha ki te whakaea i tētahi pūtea taurewa – Ka taea e koe ngā utunga (me ngā huamoni)?
Te tono i tētahi mōkete, pūtea taurewa mō te whenua Māori
Tē taea e te Kooti Whenua Māori te whakaawe tētahi pēke, umanga pūtea taurewa ina tukuna he whakatau mō te tuku mōkete, pūtea taurewa ki ngā kaipupuri whenua.
Mō te tono mōkete, pūtea taurewa rānei, ka tonoa koe ki te tuku mōhiohio pūtea me te moni whiwhi, ā, ka arotakehia ēnei e te pēke hei whiriwhiri i tō kaha ki te utu i te pūtea taurewa.
Me auau te utu haere i ngā whakaaetanga pūtea taurewa, mōkete rānei utu i te nama. Ina ea katoa i a koe te rahinga o te moni tārewa me ngā huamoni, ka katia e te pēke, e te whakanōhanga taurewa te pūtea taurewa, mōkete rānei.
KIA MATAARA: He nui te mōrea ki te whakamahi i ngā pānga whenua takitahi o ngā whenua Māori he nui ōna kaipupuri whenua hei punga mō tētahi pūtea taurewa. Ka taea e ngā pēke me ngā umanga pūtea taurewa te hoko ō whenua ki te utu mākete mēnā ka hapa ō utunga, ā, he ngaronga kino tēnei mō tō whānau. Kāore he mana o te Kooti Whenua Māori ki te aukati i tēnei. Heoi, e kore e taea e koe te whakamahi tētahi poraka whenua Māori hei punga me te kore whakaae, tautoko hoki/rānei a ētahi atu kaipupuri whenua katoa.
Ina tono ana i tētahi pūtea taurewa, mōkete rānei hei whakamahi, whakawhanake hoki/rānei i te whenua Māori, ka tonoa koe ki te whakarato mōhiohio mō ō rawa. Kei roto pea i tēnei ko te whenua e whakamahia ana, e whakawhanaketia ana e koe, ā, ka taea te whakamahi hei ‘taituarā’, punga rānei mō ngā pūtea i whakaaetia.
Mēnā kei te whai whakaaro koe ki tēnei kōwhiringa, me mātua kōrero atu ki te kaituku pūtea he nui ngā kaipupuri whenua, i te mea kāore e tino whakaae ngā kaituku pūtea ki ngā pānga takitahi hei punga i roto i ngā whenua Māori he nui ōna kaipupuri whenua.
Me rapu tohutohu ture i mua i te whai whakaaro ki te whakamahi i te whenua Māori hei punga mō te pūtea. Ka taea e Ngā Pou Whakawhirinaki o Aotearoa o tō rohe koe te āwhina ki te whakahaere i ō pūtea mēnā kei te raruraru ā-pūtea koe.
