Te hono mamao ki te kōtitanga
Attending a court hearing remotely

Mēnā ka hiahia koe ki te hono mamao ki tō kōtitanga, me wawe tonu te whakamōhio mai kia taea ai e mātou te whakarite mai i konei. I mua i te tuku i tētahi tono kia mōhio mai:

• Me whakaae rawa e te kaiwhakawā kia hono mamao atu ki tētahi kōtitanga. Mēnā ka whakakāhoretia tō tono, me mātua tae atu ā-tinana mai koe.
• Kei runga katoa i a koe ngā āhuatanga katoa e pā ana ki te whakahaere i te hangarau, tae atu ki ngā utu whakahaere i tō hangarau.
• Tē taea e mātou te tuku hangarau, tautoko hangarau rānei ki a koe. Me rapu āwhina, tautoko atu rānei koe mai i tō whānau.
• Mēnā ka whakaaetia tō tono, me mātua whakauru mai ki tētahi waea whakamātautau hei whakarite kei te mahi tika te hangarau e whakamahia ana e koe. 

Mēnā ka hiahia koe ki te hono mamao ki tētahi kooti, me mātua whakarite he hangarau tōtika āu, he Wi-Fi, me te pūmanawa rorohiko. Ka āwhina tēnei i a koe ki te whakarite ka tino pai te haere mō koutou ko tō whānau. 

I mua i te kōtitanga, ka whakapā atu mātou ki a koe ki te whakarite i tētahi waea whakamātautau. Ko te kaupapa o te whakamātautau waea he:

• Whakaū ka tino taea e koe te hono mai mā runga waea, mā te hui ā-ataata rānei, ā, ka taea e koe te whakamahi te hangarau.
• Whakaū i ngā tikanga o te kooti.
• Whakautu i ō patai.

Mēnā kei te whai wāhi koe mā runga waea, me whai koe i tētahi waea kāinga tōtika, waea pūkoro rānei, ka mutu me tuku mai e koe tō tau waea whakapā.

Mēnā kei te whai wāhi mai koe mā runga ataata, me mātua whai i tētahi:

• waea pūkoro tōtika, rorohiko, rorohikopona, paparorohiko rānei e hototahi ana ki te ataata me te uruoro
• tūhonohono ipurangi pūmau mā te Wi-Fi, ngā raraunga pūkoro rānei.

Mēnā kei te whakamahi koe i tētahi rorohiko, rorohikopona rānei, me mātua whai koe i:

• te Windows 7, 8, 10 rānei, te MacOS X 10.7 (Lion), putanga hou ake rānei
• he pūtirotiro tukutuku e tautokona ana:
  • Firefox 10, hou ake rānei
  • Chrome 18, hou ake rānei
  • Internet Explorer 8, hou ake rānei (kaua te Edge).

He ōrite ngā tikanga kooti mō tētahi kōtitanga ā-mamao ki te kōtitanga ā-tinana, ahakoa kei te hono mamao mai koe, he tikanga ōkawa tonu.

E tūtohu ana mātou:

• Kia kimihia mai e koe he rūma mārire me te tōtika kāore he turituri, whakapōrearea rānei.
• Me tōtika ō kākahu, pērā tonu i tō haere atu ā-tinana ki tētahi kōtitanga.
• Me whakarite kei te kitea mai koe i runga kāmera, ā, ka kitea mai tō kanohi me ō pakihiwi.
• Kaua e kai, e inu rānei i te wā o tō kōtitanga. Ka tino whakapōrearea pea tēnei, ā, ka whakararu i te kounga oro.
• Me taunga koe ki tō pātene whakahaere, hei tauira, te pātene kahaoro me te whakangū.
• Me mātua whakarite kua whakangūtia tō pūrere i tō honotanga atu ki te kōtitanga, i te mea ka hono atu pea koe i te wā e whakawātia ana tētahi atu tono. Me tatari koe kia pānuitia tō tono i mua i tō wetengū i a koe anō, me whakaū kei reira koe, me te whakamōhio atu ki te kooti he tāngata atu anō kei reira i tō taha.
• Ina kōrero koe ki te kaiwhakawā me kī atu koe ko ‘Tō Hōnore (Your Honour)’, ‘Kaiwhakawā (Judge)’ rānei.
• Me mārama te kōrero i tō waea, uruoro rānei, ā, ka whakahua i tō ingoa i mua i tō kōrero.
• Mēnā he tāngata atu anō kua tae atu, kei reira rānei mō taua take anō, me whakangū i tō pūrere i te wā kei te kōrero ētahi atu anō.
• Me tūhono anō mēnā ka raru te tūhononga i te wā o te kōtitanga. Mēnā ka raru anō, me whakapā tonu atu ki te kooti.
• Me makere tonu mai i te waea ina mutu te kōtitanga.